ကန့်ကွက်မဲများ တခဲနက်ပေးပါရန် ပြည်ပအဖွဲ့များ ပူးတွဲတိုက်တွန်း

နေသွင်
မဇ္ဈိမ
၂၀၀၈ ဖေဖော်ဝါရီ ၂၉

ချင်းမိုင်။ ။ ကန့်ကွက်မဲပေးခြင်းဖြင့် စစ်အာဏာရှင်စနစ် တည်မြဲစေမည့် အခြေခံဥပဒေ မူကြမ်းကို ပယ်ချလိုက်ပါရန် ပြည်ပအခြေစိုက် တိုင်းရင်းသားများနှင့် ဒီမိုကရေစီ အင်အားစုများက စုပေါင်း တိုက်တွန်း လိုက်ကြသည်။

ပြည်ထောင်စု မြန်မာနိုင်ငံ အမျိုးသားကောင်စီ၊ ပြည်ထောင်စု မြန်မာနိုင်ငံ အမျိုးသားညွန့်ပေါင်း အစိုးရ၊ တိုင်းရင်းသား လူမျိုးများကောင်စီ၊ အမျိုးသမီးအဖွဲ့ချုပ် (မြန်မာနိုင်ငံ)၊ မြန်မာနိုင်ငံ ဒီမိုကရက်တစ် အင်အားစု၊ မြန်မာနိုင်ငံ ကျောင်းသားလူငယ်များ ကွန်ဂရက်၊ တိုင်းရင်းသား လူငယ်များ ဆုံရပ်တို့၏ ယမန်နေ့က ထုတ်ပြန်သော ပူးတွဲ ကြေညာချက်တွင် စစ်အစိုးရ၏ ခြေလှမ်းများသည် “တိုင်းရင်းသား စည်းလုံး ညီညွတ်ရေးကို ဦးတည်ခြင်း မရှိဘဲ စစ်အာဏာရှင်စနစ် တည်မြဲရေးကိုသာ ရှေ့ရှုနေသောကြောင့်” လုံးဝ လက်မခံနိုင်ဟု ပါရှိသည်။

မေလတွင် ဖွဲ့စည်းပုံ အခြေခံဥပဒေ မူကြမ်းကို ဆန္ဒခံယူပွဲ လုပ်မည်၊ ၂ဝ၁ဝ တွင် ရွေးကောက်ပွဲ ပြုလုပ်မည် ဆိုသော ကြေညာချက် ထွက်ပေါ်လာပြီးနောက် ပြည်ပ အတိုက်အခံများ၏ ပထမဆုံး စုပေါင်းကြေညာချက် ထွက်လာခဲ့ခြင်း ဖြစ်ရာ ဆန္ဒမဲ မပေးဘဲ နေရေးနှင့် ကန့်ကွက်မဲ ပေးရေး နည်းလမ်းပိုင်းဆိုင်ရာ အငြင်းပွားမှုများ အဆုံးသတ်သွားစေသည်။

ပြည်ထောင်စု မြန်မာနိုင်ငံ အမျိုးသားကောင်စီမှ ဝန်ကြီး ဒေါက်တာစန်းအောင်က “ပြည်သူဆန္ဒ ခံယူပွဲ တကယ်တမ်း ဖြစ်လာရင်၊ နအဖက မဖြစ်မနေ လုပ်မယ်ဆိုရင် ပြည်သူတွေကို ဒီလိုလုပ်ပါလို့ တိုက်တွန်းတာ ဖြစ်ပါတယ်။ ဒါဟာ မြန်မာပြည်ရဲ့ ထွက်ရပ်လမ်းတော့ မဟုတ်ဘူး” ဟု ပြောသည်။

စင်ပြိုင်အစိုးရ အနေဖြင့် သုံးပွင်ဆိုင် တွေ့ဆုံ ဆွေးနွေးရေးသည် မရှိမဖြစ်ဟု စွဲစွဲမြဲမြဲ ယုံကြည်ထားဆဲ ဖြစ်ပြီး မြန်မာပြည်တွင် တွေ့ဆုံ ဆွေးနွေးရေးများ ပြန်စရန် ကုလသမဂ္ဂ ကိုယ်စားလှယ် မစ္စတာ ဂမ်ဘာရီမှတဆင့် တိုက်တွန်း လုပ်ဆောင်သွားမည်ဟု ဒေါက်တာ စန်းအောင်က ပြောသည်။

အလားတူ အမျိုးသား ဒီမိုကရေစီ အဖွဲ့ချုပ်ကလည်း စစ်အစိုးရ၏ မေလဆန္ဒခံယူပွဲ အစီအစဉ်သည် တဖက်သတ် အစီအစဉ် ဖြစ်ပြီး အမျိုးသား ပြန်လည်သင့်မြတ်ရေးကို ထိခိုက်နိုင်ကြောင်း ယမန့်နေ့က ဝေဖန်လိုက်သည်။

စစ်အစိုးရ၏ လုပ်ရပ်သည် ကုလသမဂ္ဂ အပါအဝင် နိုင်ငံတကာက တောင်းဆို တိုက်တွန်းနေသော နိုင်ငံတော် ဖွဲ့စည်းပုံ ရေးဆွဲရေးနှင့် ပြုပြင်ပြောင်းလဲရေးတွင် သက်ဆိုင်သူအားလုံး ပါဝင်ရမည်ဆိုသော အချက်ကို ဆန့်ကျင်နေသည်ဟုလည်း ဝေဖန်ထားသည်။

အမျိုးသား ဒီမိုကရေစီ အဖွဲ့ချုပ်သည် ၁၉၉ဝ ရွေးကောက်ပွဲတွင် အပြတ်အသတ် အနိုင်ရထားသောပါတီ ဖြစ်သော်လည်း စစ်အစိုးရက ရွေးကောက်ပွဲ ရလဒ်ကို ငြင်းပယ်ကာ ပါတီခေါင်းဆောင် ဒေါ်အောင်ဆန်းစုကြည်ကိုလည်း ဖမ်းဆီးထားသည်။

အနိုင်ရ လွှတ်တော်ကိုယ်စားလှယ်များသာ အခြေခံဥပဒေ မူကြမ်းသာ ရေးဆွဲရန် တာဝန်ရှိဆိုသော ဥပဒေ (၁/၉ဝ) ကို ကျောခိုင်းကာ၊ ဝေဖန် ကန့်ကွက်မှုများ ခွင့်မပြုသော၊ လွတ်လပ်စွာ ဆွေးနွေးခွင့် မပြုသော မူကြမ်း ရေးဆွဲရေးကို ၁၄ နှစ်ကြာ အချိန်ယူကာ စစ်အစိုးရ အလိုကျများဖြင့် ရေးဆွဲခဲ့သည်။

ထို့နောက် ရွေးကောက်ပွဲ အသစ်တခု ထပ်မံလုပ်ရန် လိုသည်ဟုဆိုပြီး ၂ဝ၁ဝ တွင် ရွေးကောက်ပွဲ ကျင်းပမည်ဟု ကြေညာခဲ့သည်။ ထိုရွေးကောက်ပွဲတွင် ဒေါ်အောင်ဆန်းစုကြည် ပါဝင်ခွင့် မရှိဟု ကြိုတင် ကန့်သတ်ထားလိုက်ပြန်သည်။