နေသွင်
မဇ္ဈိမ
၂၀၀၈ ဖေဖော်ဝါရီ ၂၉
ချင်းမိုင်။ ။ ကန့်ကွက်မဲပေးခြင်းဖြင့် စစ်အာဏာရှင်စနစ် တည်မြဲစေမည့် အခြေခံဥပဒေ မူကြမ်းကို ပယ်ချလိုက်ပါရန် ပြည်ပအခြေစိုက် တိုင်းရင်းသားများနှင့် ဒီမိုကရေစီ အင်အားစုများက စုပေါင်း တိုက်တွန်း လိုက်ကြသည်။
ပြည်ထောင်စု မြန်မာနိုင်ငံ အမျိုးသားကောင်စီ၊ ပြည်ထောင်စု မြန်မာနိုင်ငံ အမျိုးသားညွန့်ပေါင်း အစိုးရ၊ တိုင်းရင်းသား လူမျိုးများကောင်စီ၊ အမျိုးသမီးအဖွဲ့ချုပ် (မြန်မာနိုင်ငံ)၊ မြန်မာနိုင်ငံ ဒီမိုကရက်တစ် အင်အားစု၊ မြန်မာနိုင်ငံ ကျောင်းသားလူငယ်များ ကွန်ဂရက်၊ တိုင်းရင်းသား လူငယ်များ ဆုံရပ်တို့၏ ယမန်နေ့က ထုတ်ပြန်သော ပူးတွဲ ကြေညာချက်တွင် စစ်အစိုးရ၏ ခြေလှမ်းများသည် “တိုင်းရင်းသား စည်းလုံး ညီညွတ်ရေးကို ဦးတည်ခြင်း မရှိဘဲ စစ်အာဏာရှင်စနစ် တည်မြဲရေးကိုသာ ရှေ့ရှုနေသောကြောင့်” လုံးဝ လက်မခံနိုင်ဟု ပါရှိသည်။
မေလတွင် ဖွဲ့စည်းပုံ အခြေခံဥပဒေ မူကြမ်းကို ဆန္ဒခံယူပွဲ လုပ်မည်၊ ၂ဝ၁ဝ တွင် ရွေးကောက်ပွဲ ပြုလုပ်မည် ဆိုသော ကြေညာချက် ထွက်ပေါ်လာပြီးနောက် ပြည်ပ အတိုက်အခံများ၏ ပထမဆုံး စုပေါင်းကြေညာချက် ထွက်လာခဲ့ခြင်း ဖြစ်ရာ ဆန္ဒမဲ မပေးဘဲ နေရေးနှင့် ကန့်ကွက်မဲ ပေးရေး နည်းလမ်းပိုင်းဆိုင်ရာ အငြင်းပွားမှုများ အဆုံးသတ်သွားစေသည်။
ပြည်ထောင်စု မြန်မာနိုင်ငံ အမျိုးသားကောင်စီမှ ဝန်ကြီး ဒေါက်တာစန်းအောင်က “ပြည်သူဆန္ဒ ခံယူပွဲ တကယ်တမ်း ဖြစ်လာရင်၊ နအဖက မဖြစ်မနေ လုပ်မယ်ဆိုရင် ပြည်သူတွေကို ဒီလိုလုပ်ပါလို့ တိုက်တွန်းတာ ဖြစ်ပါတယ်။ ဒါဟာ မြန်မာပြည်ရဲ့ ထွက်ရပ်လမ်းတော့ မဟုတ်ဘူး” ဟု ပြောသည်။
စင်ပြိုင်အစိုးရ အနေဖြင့် သုံးပွင်ဆိုင် တွေ့ဆုံ ဆွေးနွေးရေးသည် မရှိမဖြစ်ဟု စွဲစွဲမြဲမြဲ ယုံကြည်ထားဆဲ ဖြစ်ပြီး မြန်မာပြည်တွင် တွေ့ဆုံ ဆွေးနွေးရေးများ ပြန်စရန် ကုလသမဂ္ဂ ကိုယ်စားလှယ် မစ္စတာ ဂမ်ဘာရီမှတဆင့် တိုက်တွန်း လုပ်ဆောင်သွားမည်ဟု ဒေါက်တာ စန်းအောင်က ပြောသည်။
အလားတူ အမျိုးသား ဒီမိုကရေစီ အဖွဲ့ချုပ်ကလည်း စစ်အစိုးရ၏ မေလဆန္ဒခံယူပွဲ အစီအစဉ်သည် တဖက်သတ် အစီအစဉ် ဖြစ်ပြီး အမျိုးသား ပြန်လည်သင့်မြတ်ရေးကို ထိခိုက်နိုင်ကြောင်း ယမန့်နေ့က ဝေဖန်လိုက်သည်။
စစ်အစိုးရ၏ လုပ်ရပ်သည် ကုလသမဂ္ဂ အပါအဝင် နိုင်ငံတကာက တောင်းဆို တိုက်တွန်းနေသော နိုင်ငံတော် ဖွဲ့စည်းပုံ ရေးဆွဲရေးနှင့် ပြုပြင်ပြောင်းလဲရေးတွင် သက်ဆိုင်သူအားလုံး ပါဝင်ရမည်ဆိုသော အချက်ကို ဆန့်ကျင်နေသည်ဟုလည်း ဝေဖန်ထားသည်။
အမျိုးသား ဒီမိုကရေစီ အဖွဲ့ချုပ်သည် ၁၉၉ဝ ရွေးကောက်ပွဲတွင် အပြတ်အသတ် အနိုင်ရထားသောပါတီ ဖြစ်သော်လည်း စစ်အစိုးရက ရွေးကောက်ပွဲ ရလဒ်ကို ငြင်းပယ်ကာ ပါတီခေါင်းဆောင် ဒေါ်အောင်ဆန်းစုကြည်ကိုလည်း ဖမ်းဆီးထားသည်။
အနိုင်ရ လွှတ်တော်ကိုယ်စားလှယ်များသာ အခြေခံဥပဒေ မူကြမ်းသာ ရေးဆွဲရန် တာဝန်ရှိဆိုသော ဥပဒေ (၁/၉ဝ) ကို ကျောခိုင်းကာ၊ ဝေဖန် ကန့်ကွက်မှုများ ခွင့်မပြုသော၊ လွတ်လပ်စွာ ဆွေးနွေးခွင့် မပြုသော မူကြမ်း ရေးဆွဲရေးကို ၁၄ နှစ်ကြာ အချိန်ယူကာ စစ်အစိုးရ အလိုကျများဖြင့် ရေးဆွဲခဲ့သည်။
ထို့နောက် ရွေးကောက်ပွဲ အသစ်တခု ထပ်မံလုပ်ရန် လိုသည်ဟုဆိုပြီး ၂ဝ၁ဝ တွင် ရွေးကောက်ပွဲ ကျင်းပမည်ဟု ကြေညာခဲ့သည်။ ထိုရွေးကောက်ပွဲတွင် ဒေါ်အောင်ဆန်းစုကြည် ပါဝင်ခွင့် မရှိဟု ကြိုတင် ကန့်သတ်ထားလိုက်ပြန်သည်။
Saturday, March 1, 2008
ကန့်ကွက်မဲများ တခဲနက်ပေးပါရန် ပြည်ပအဖွဲ့များ ပူးတွဲတိုက်တွန်း
ကန့်ကွက်မဲဖြင့် “ဖွတ်မြီးနဲ့ဖွတ်ကို ချည်စို့” ဟု ကွန်မြူနစ်ပါတီပြော
နေသွင်
မဇ္ဈိမ
၂၀၀၈ ဖေဖော်ဝါရီ ၂၈
ချင်းမိုင်။ ။ မေလတွင် ပြုလုပ်မည့် ဆန္ဒခံယူပွဲတွင် ကန့်ကွက်မဲ ပေးခြင်းနည်းဖြင့် စစ်အစိုးရကို အလဲထိုးနိုင်မည် ဖြစ်ကြောင်း ဗမာပြည် ကွန်မြူနစ်ပါတီက ကြေညာလိုက်သည်။
စစ်ဗိုလ်ချုပ်များသည် လူထုဆန္ဒ ခံယူပွဲကို “မတတ်သာလို့” လုပ်ရခြင်း ဖြစ်ပြီး၊ လူထုအနေဖြင့် (၄၆) နှစ် သက်တမ်းရှည်နေသော စစ်အုပ်ချုပ်ရေးကို ယခုတကြိမ်တွင် “အလဲထိုး” ရမည်ဟု ဗမာပြည် ကွန်မြူနစ်ပါတီ ပြောရေးဆိုခွင့်ရှိသူ၏ ယနေ့ ထုတ်ပြန်ချက်တွင် ဖော်ပြထားသည်။
“ဆန္ဒခံယူပွဲ လုပ်မယ့်ရက် မကြေညာဘဲထားပြီး သူတို့တကောင်တည်း ပြေးနေပါတယ်။ လူထုကို ချည်ပြီးတုပ်ပြီး ပါးစပ်ပိတ် နားပိတ်ပြီး အနိုင်ယူဖို့ လုပ်နေပါတယ်။ ဒါပေမဲ့ “ဖွတ်ကို ဖွတ်မြည်းနဲ့ ချည်တဲ့နည်း” ကျနော်တို့ လူထုကြီးက လုပ်ရပါမယ်” ဟု ကြေညာချက်တွင် ဖော်ပြထားသည်။
သို့သော် စစ်အစိုးရ အနေဖြင့် အချိန်ဆွဲ နည်းဗျူဟာကို ပြန်လည် ကျင့်သုံးလာနိုင်သေးကြောင်း ဗကပ ပြောရေးဆိုခွင့် ရှိသူက ထပ်မံ သတိပေးလိုက်သည်။
ရဲဘော်ဖိုးသံချောင်းက “ဒါက နှိုင်းစာခြင်း ပြောတာပါ။ ဒီလို မဲပေးလိုက်ခြင်းဖြင့် နအဖ အလုံးစုံ ပြုတ်ကျသွားမယ်လို့ ပြောလို့ မရပါဘူး။ ဘာကြောင့်လဲဆိုရင် နအဖဟာ ဘာကိုမဆို တွက်ပြီး ပြင်ထားပြီးသားလို့ ကျနော်တို့ ထင်ပါတယ်။ အားလုံးက ကန့်ကွက်လို့ ဖွဲ့စည်းပုံကို ခေါက်ထား လိုက်တယ် ထားပါဦးတော့။ သူတို့က ညောင်နှစ်ပင် ထပ်ခေါ်ဦးကြစို့ကွာ ဆိုပြီး (၁၄) နှစ် ဆွဲနေဦးမယ်” ဟု မဇ္ဈိမသို့ တယ်လီဖုန်းမှတဆင့် ပြောသည်။
လောလောဆယ်တွင် စစ်အစိုးရ ထိပ်သီးပိုင်းတွင် သံဃာအရေးအခင်း နောက်ပိုင်းတွင် သဘောကွဲလွဲမှုများ ရှိနေပြီး ပြည်သူဘက်က ဆန္ဒပြင်းပြင်းပြပြ ဖော်ပြနိုင်လျှင် ဒီမိုကရေစီ လှုပ်ရှားမှုအတွက် ကောင်းသော အလားအလာ ဖြစ်သည်ဟု သူကမြင်သည်။
ဆန္ဒခံယူပွဲတွင် သပိတ်မှောက်သည့်နည်းကို သုံးလျှင် နအဖအကြိုက်တွေ့မည် ဟုဆိုလိုက်ပြီး ယခုအချိန်သည် ဒီမိုကရေစီ အင်အားစုများဘက်က တသံတည်းထွက်ပြီး ပြည်သူလူထုကို အချိန်မီ လှုံ့ဆော်ရန် လိုအပ်ပြီ ဟု သတိပေးသည်။
ဆန္ဒခံယူပွဲတွင် ကန့်ကွက်မဲပေးခြင်း နည်းလမ်းသည် ဒေါ်အောင်ဆန်းစုကြည် လွတ်မြောက်ရေး၊ မင်းကိုနိုင် လွတ်မြောက်ရေး၊ ၁၉၉ဝ လွတ်တော် ခေါ်ယူရေး၊ အဖမ်းခံထားရသော အမတ်များ လွတ်မြောက်ရေး စသော ပြဿနာများ ပြေလည်စေမည်ဟု ဗကပ၏ ကြေညာချက်တွင် ဖော်ပြထားသည်။
ပြည်တွင်းမှ စီအာရ်ပီပီခေါ် ပြည်သူလွှတ်တော် ကိုယ်စားပြု ကော်မတီ အဖွဲ့ဝင် ဦးအေးသာအောင်က ဆန္ဒခံယူပွဲ အစစ်အမှန် မဖြစ်နိုင်ဟု ယုံကြည်ထားပြီး အမှန်တကယ် မြန်မာပြည်နိုင်ငံရေး ပြဿနာ ပြေလည်သွားရေးအတွက် တွေ့ဆုံဆွေးနွေးရေး မရှိမဖြစ် လိုသည်ဟု ပြောသည်။
“ဒီကနေ့ အချိန်အခါမှာ တိုင်းပြည်မှာ လက်ရှိ အုပ်ချုပ်နေတဲ့ အစိုးရ ယန္တယားရဲ့ အားက၊ လက်တံက ရှည်တော့ ပြည်သူတွေ အနေနဲ့ တကယ့်ကို စစ်မှန်တဲ့ ဆန္ဒကို ပေးနိုင်မပေးနိုင် ဆိုတာ မသေချာဘူး။ မြို့ပေါ်မှာ တကယ်ပေးနိုင်သည့် တိုင်အောင်၊ နယ်တွေ၊ ကျေးလက်တွေမှာ ပြည်သူတွေရဲ့ ဆန္ဒကို လွတ်လွတ်လပ်လပ် ပေးနိုင်မယ်လို့ အန်ကယ်တို့ မယူဆဘူး။ ထွက်လာတဲ့ တကယ် ရလဒ်ဟာလည်း ပြည်သူတွေက ပေးလိုက်တဲ့ ဆန္ဒ အစစ်အမှန် မဟုတ်နိုင်ဘူး။ အဲဒါကြောင့် ဒီဆန္ဒ ခံယူပွဲဟာ စစ်မှန်တဲ့ ပြည်သူတွေရဲ့ ဆန္ဒဖြစ်မယ်လို့ ယူဆနိုင်ဖွယ် အလွန့်ကို နည်းပါတယ်” ဟု ဦးအေးသာအောင်က ပြောသည်၊
စစ်အစိုးရ၏ ဖွဲ့စည်းပုံတွင် တိုင်းရင်းသားများ၏ လိုလားချက်ဖြစ်သော ဖက်ဒရယ် ပြည်ထောင်စု စစ်စစ်ကို ပေးအပ်ထားခြင်း မရှိသဖြင့် ပြည်တွင်း ငြိမ်းချမ်းရေးကို တည်ဆောက်နိုင်မည် မဟုတ်ကြောင်၊ ပြည်တွင်း ငြိမ်းချမ်းရေးကို မတည်ဆောက်နိုင်လျှင် စီးပွားရေး၊ လူမှုရေး၊ ပညာရေးများ ကောင်းမွန်လာမည် မဟုတ်ဘဲ အဆိုးဘက်သို့သာ ဦးတည်နေသည်ဟု ဦးအေးသာအောင်က ဝေဖန်သည်။
“ဖွဲ့စည်းပုံ အခြေခံဥပဒေ အတည်မဖြစ်ဘူးဆိုရင် ပြည်သူတွေ ဆန္ဒကို လက်လျှောမလား၊ ဒါ မသေချာဘူး။ ကောင်းပြီး အတည်ပြုခဲ့လို့ ဖွဲ့စည်းပုံအတိုင်း သွားရင် တိုင်းပြည် အကျိုးရှိမလား။ မရှိနိုင်ဘူး။ နိုင်ငံရေး အင်အားစုတွေရဲ့ ညီညွတ်မှု၊ တိုင်းရင်းသားတွေရဲ့ ညီညွတ်မှုကို မတည်ဆောက်နိုင်သမျှ ပြည်တွင်းမှာ နိုင်ငံရေး တည်ငြိမ်မှုရှိမှာ မဟုတ်ဘူး။ နိုင်ငံရေး မတည်ငြိမ်ရင် စီးပွားရေး တည်ငြိမ်မှု မရှိနိုင်ဘူး” ဟု ဦးအေးသာအောင်က ပြောသည်။
ပြည်သူ့လွှတ်တော် ကိုယ်စားပြု ကော်မတီတွင် အမျိုးသား ဒီမိုကရေစီ အဖွဲ့ချုပ်၊ ရခိုင် ဒီမိုကရေစီ အဖွဲ့ချုပ်၊ မွန်အမျိုးသား ဒီမိုကရေစီ အဖွဲ့ချုပ်၊ ရှမ်းတိုင်းရင်းသားများ ဒီမိုကရေစီ အဖွဲ့ချုပ်နှင့် ဇိုမီး အမျိုးသား ကွန်ဂရက် စသော ၁၉၉ဝ ပြည့် ရွေးကောက်ပွဲတွင် အနိုင်ရထားသော ပါတီတို့ဖြင့် ၁၉၉၈ ခုနှစ်တွင် ဖွဲ့စည်းခဲ့ခြင်း ဖြစ်သည်။
အမျိုးသားကာကွယ်ရေးနှင့်လုံခြုံရေး ကောင်စီ
ကာကွယ်ရေးဦးစီးချုပ်က သမ္မတလောင်း (၂) ကို သူရွေးချယ်ပေးထားသော စစ်သားအမတ်များမှတဆင့် ရွေးချယ်သည်။ ၄င်းသမ္မတလောင်းသည် သမ္မတသော်၎င်း၊ ဒုသမ္မတသော်၎င်း ဖြစ်လာပေမည်။ တဖန် ကာကွယ်ရေး၊ ပြည်ထဲရေး နှင့် နယ်စပ်ရေးရာ ၀န်ကြီးဌာန ၀န်ကြီးတို့သည်လည်း ကာကွယ်ရေးဦးစီးချုပ်ရွေးထားသော စစ်သားများသာဖြစ်သည်။
စာရင်းချုပ်လိုက်လျှင် ၁၁ ဦး ပါဝင်သော အမျိုးသားကာကွယ်ရေးနှင့်လုံခြုံရေးကောင်စီ (မကလ) တွင် ကာကွယ်ရေးဦးစီးချုပ်၏လူ အနည်းဆုံး ၆ဦး ရှိနေပေပြီ။ မကလ တွင် နိုင်ငံတော် အရေးပေါ်အခြေအနေကြေညာနိုင်သည့် အာဏာ (တနည်းဆိုသော် အာဏာသိမ်းခွင့်) ရှိသည်။ ထို့ကြောင့် ကာကွယ်ရေးဦးစီးချုပ်က သူ့လူများ အားကိုးဖြင့် အကြောင်းမရှိ အကြောင်းရှာကာ အာဏာသိမ်းနိုင်ခွင့်ကို ဤအခြေခံဥပဒေက တရားဝင် ပြဋ္ဌာန်းပေးထားသည်။
သမ္မတ
သမ္မတသည် နိုင်ငံတော် အကြီးအကဲဖြစ်သည်။
ရွေးချယ်ပုံကိုကြည့်ပါ။
ပြည်သူ့လွှတ်တော်ထဲမှ အရပ်သားအမတ်များ (၃၃၀ ဦး) က သမ္မတလောင်း တစ်ဦး
အမျိုးသားလွှတ်တော်ထဲမှ အရပ်သားအမတ်များ (၁၆၈ ဦး) က သမ္မတလောင်း တစ်ဦး
ကာကွယ်ရေးဦးစီးချုပ်၏ လက်ရွေးစင် စစ်သားအမတ်များ (၁၆၆ ဦး) က သမ္မတလောင်း တစ်ဦး
အသီးသီး ရွေးပေးရမည်။
ထိုသမ္မတလောင်း သုံးဦးကို လွှတ်တော်ကိုယ်စားလှယ်အားလုံး (၃၃၀ + ၁၆၈ + ၁၆၆ = ၆၆၄) က မဲပေးပြီးရွေးမည်။ မဲအနည်းအများအလိုက်၊ သမ္မတ၊ ဒုသမ္မတ(၁) နှင့် ဒုသမ္မတ(၂) တို့ဖြစ်လာမည်။
သမ္မတလောင်း၏ အရည်အချင်းများထဲမှ အထူးသတိပြုရန်အချက်မှာ
“နိုင်ငံတော် သမ္မတသည် မိမိကိုယ်တိုင်သော်လည်းကောင်း၊ မိမိ၏မိဘတစ်ပါးပါးသော်လည်းကောင်း၊ မိမိ၏ဇနီး သို့မဟုတ် ခင်ပွန်းသော်လည်းကောင်း၊ မိမိ၏ တရားဝင် သားသမီးတစ်ဦးဦးသော်လည်းကောင်း၊ ထို တရားဝင်သားသမီးတစ်ဦးဦး၏ ဇနီး သို့မဟုတ် ခင်ပွန်းသော်လည်းကောင်း၊ နိုင်ငံခြားအစိုးရ၏ ကျေးဇူးသစ္စာတော်ကို ခံယူစောင့်ရှောက်ရိုသေသူ သို့မဟုတ် နိုင်ငံခြားအစိုးရ၏ လက်အောက်ခံဖြစ်သူ သို့မဟုတ် တိုင်းတစ်ပါး၏ နိုင်ငံသားဖြစ်သူများ မဖြစ်စေရ၊ ထိုသူများသည် နိုင်ငံခြားအစိုးရ၏ လက်အောက်ခံဖြစ်သူသော်လည်းကောင်း၊ တိုင်းတစ်ပါး၏ နိုင်ငံသားသော်လည်းကောင်း၊ ခံစားရသော အခွင့်အရေးများနှင့် ကျေးဇူးခံစားခွင့်များကို ခံစားနိုင်ခွင့်ရှိသူများ မဖြစ်စေရ”
ဒေါ်အောင်ဆန်းစုကြည်သည် သမ္မတလောင်း အရည်အချင်း နှင့် မကိုက်ညီဟု ဆိုလိုချင်ဟန်ရှိသည်။
